Ledi Gaga Oq uy san'at va madaniyat qo'mitasining hamraisi etib tayinlandi

AQSh prezidenti Jo Bayden qo‘shiqchi va aktrisa Ledi Gagani AQSh prezidenti huzuridagi San’at va gumanitar fanlar qo‘mitasiga hamrais etib tayinladi. Bu haqda Oq uy matbuot xizmati xabar berdi.

AQSh Prezidenti huzuridagi San'at va gumanitar fanlar qo'mitasi 1982-yilda Ronald Reygan tomonidan Oq uyga madaniyat siyosati bo'yicha maslahat berish uchun tashkil etilgan. AQSh ma'muriyatining press-relizida ta'kidlanganidek, uning tarkibiga "san'at va gumanitar fanlarga jiddiy sodiqlik ko'rsatgan taniqli rassomlar, olimlar va xayriyachilar" kiradi.

Ledi Gaga (haqiqiy ismi Stefani Germanotta) Oq uy bayonotida "tarixdagi eng muvaffaqiyatli ayol musiqachilardan biri" deb topilgan. O'zining musiqiy faoliyati davomida u 170 milliondan ortiq plastinkalarni sotgan va 13 ta Grammy mukofotini qo'lga kiritgan.

Shuningdek, u Forbes jurnali tomonidan dunyoning eng nufuzli ayollari ro'yxatiga, shuningdek, Time jurnali bo'yicha dunyodagi eng nufuzli 100 kishi ro'yxatiga kiritilgan.