Dubayda o‘zbek hunarmandchilik mahsulotlari do‘koni tashkil etiladi

BAAda O‘zbekiston “Hunarmandlar” uyushmasi raisi Ulug‘bek Abdullayev O‘zbekiston elchixonasi ko‘magida “Sheikh Zayed Grand Mosque” majmuasi rahbariyati bilan uchrashuv o'tkazdi.

Uchrashuvda har yil noyabr va mart oylarida Abu Dabi amirligida bo‘lib o‘tadigan “Shayx Zoid” festivalida O‘zbekiston pavilyonini tashkil etish va o‘zbek hunarmandchiligi mahsulotlarini targ‘ib qilish masalalari muhokama qilindi.

Abu-Dabi va Dubay shaharlaridagi yirik savdo markazlarida o‘zbek hunarmandchilik mahsulotlari do‘konlarini tashkil etish yuzasidan fikr almashildi.

Shuningdek, "Precise group" kompaniyalar guruhi prezidenti L.Xoxman bilan bo‘lib o‘tgan uchrashuvda kompaniyaning esdalik sovg‘alarini ishlab chiqarish imkoniyatlarini O‘zbekistonda yo‘lga qo‘yish masalalari muhokama qilindi.

Muzokaralar natijasida joriy oyda Dubay xalqaro aeroportiga tutash hududda, "Precise group" kompaniyasiga tegishli savdo maydonida o‘zbek hunarmandchilik mahsulotlari do‘konini tashkil etishga kelishildi.