Yaylovlardan foydalanish bo‘yicha takliflar muhokama qilindi

Prezident Shavkat Mirziyoyev yaylovlarni muhofaza qilish va ulardan samarali foydalanishga oid takliflar taqdimoti bilan tanishdi.

Bu haqda shu yil 23-yanvar kuni qishloq xo‘jaligi masalalari bo‘yicha o‘tkazilgan yig‘ilishda ko‘rsatma berilgan edi.

Yurtimizda 21 million gektardan ziyod yaylovlar mavjud bo‘lib, ular chorvachilik, ipakchilik, asalarichilik kabi ko‘plab tarmoqlar uchun muhim manba. Lekin ulardan foydalanishga oid hozirgi tartib yaylovlarda tadbirkorlikni rivojlantirish va mahsulot yetishtirishni cheklamoqda.

Shu bois, yangi tahrirda “Yaylovlar to‘g‘risida”gi qonun loyihasini hamda yaylov maydonlarini ijaraga berish tartibini ishlab chiqish taklif qilindi.

Ma’lumki, yaylov yerlarda kavrak yaxshi o‘sadi, u Qizil kitobga ham kiritilgan. Lekin ko‘p joylarda uning tabiiy ko‘payishi va qayta tiklanishiga zarar yetkazilmoqda. 2019-yilda tabiiy kavrak maydonlari 33 ming gektar bo‘lgan bo‘lsa, 2021-yilga kelib qariyb yarmiga kamaygan.

Shu bois kavrakning har bir tupiga yetkazilgan zarar uchun jarima miqdorini oshirish, qizil kitobga kiritilgan tojik kavragidan foydalanishga 3 yil muddatga moratoriy joriy qilish taklif etilmoqda.

Davlatimiz rahbari bu rejalarni ma’qullab, ijrosini samarali tashkil etish bo‘yicha qo‘shimcha ko‘rsatmalar berdi.