II MDH o'yinlari avgust oyida Belarusda o'tkaziladi

MDHga aʼzo davlatlar vakillari Yangi yil arafasida Hamdoʻstlik mamlakatlari II oʻyinlariga tayyorgarlik koʻrish va uni oʻtkazish boʻyicha ishchi guruhi yigʻilishida musobaqa nizomini tasdiqladilar. MDH Ijroiya qoʻmitasi matbuot xizmati xabariga koʻra, II MDH oʻyinlari 2023-yilning 4-14-avgust kunlari boʻlib oʻtishi rejalashtirilgan. Oʻyinlar konsepsiyasi Belarusning 11 shahrida sportning 21 turi boʻyicha tadbirlar oʻtkazilishini nazarda tutadi.

Xususan, turnir bahslari Minsk, Borisov, Brest, Vitebsk, Gomel, Grodno, Jlobin, Mogilyov, Molodechno, Orsha va Soligorsk shaharlarida oʻtkaziladi.

Ma’lum qilinishicha, MDH oʻyinlarda 3 mingga yaqin sportchi, murabbiylar, hakamlar, tibbiyot xodimlari va boshqalar ishtirok etishi kutilmoqda. Oʻyinlarda Ozarbayjon, Armaniston, Belarus, Qozogʻiston, Qirgʻiziston, Moldova, Rossiya, Tojikiston, Turkmaniston va Oʻzbekiston sport delegatsiyalari ishtirok etishi rejalashtirilgan. Moʻgʻuliston, Xitoy, Kuba, Eron, Oʻmon, Saudiya Arabistoni delegatsiyalarining ayrim sport turlarida ishtirok etish masalalari ishlab chiqilmoqda.

P.S. I MDH oʻyinlari 2021-yilning 4–11-sentabr kunlari Qozon shahrida boʻlib oʻtgan edi. Musobaqada MDHning 9 davlati – Ozarbayjon, Armaniston, Belarus, Qozogʻiston, Qirgʻiziston, Moldova, Rossiya, Tojikiston va Oʻzbekiston terma jamoalaridan 1000 nafardan ortiq sportchi ishtirok etgan. Ishtirokchilar sportning 16 turi boʻyicha 181 ta medallar jamlanmasi uchun oʻzaro musobaqalashgan.