Mahalliy byudjet mablag'larini sarflashda jamoatchilik ishtirokini ta'minlash masalasi ko'rib chiqildi
2021 yil 22 aprel kuni O'zbekiston Respublikasi Oliy Majlisi Senati Kengashining majlisi bo'lib o'tdi. Majlisni Oliy Majlis Senati Raisi Tanzila Norboyeva olib bordi.
Senat a'zolari, tegishli vazirlik va idoralar rahbarlari hamda ommaviy axborot vositalari vakillari ishtirok etgan yig'ilishda bir qator masalalar muhokama qilindi. Xususan, Senatning o'n to'rtinchi yalpi majlisini o'tkazish masalasi ko'rib chiqildi.
Senat Kengashining qarori bilan O'zbekiston Respublikasi Oliy Majlisi Senatining o'n to'rtinchi yalpi majlisi kun tartibining loyihasi qo'shimcha ravishda ayrim masalalarni o'z ichiga oldi. Shuningdek, qaror bilan loyihadan ikki masala chiqarib tashlandi.
Majlisda mahalliy byudjet mablag'larini sarflashda jamoatchilik ishtirokini ta'minlash masalasi ham ko'rib chiqildi.
Joylarda dolzarb muammolarni hal qilishda jamoatchilik ishtirokini kengaytirish maqsadida, O'zbekiston Respublikasi Prezidentining "Byudjet jarayonida fuqarolarning faol ishtirokini ta’minlash bo’yicha qo’shimcha chora-tadbirlar to’g’risida" gi 2021 yil 13 apreldagi qarori qabul qilindi.
Mazkur qaror bilan 2022 yil 1 yanvardan boshlab barcha tumanlar (shaharlar)ning tasdiqlangan umumiy byudjet xarajatlarining 5 foizi miqdorida tadbirlarni moliyalashtirishning jamoatchilik fikri asosida shakllanadigan yangi tartibini bosqichma-bosqich joriy etilishi belgilab beriladi.
Bundan tashqari, joriy yilning 1 iyul kunidan boshlab jamoatchilik fikri asosida tashkil etilgan tadbirlarni moliyalashtirish uchun tumanlar (shaharlar) byudjetlaridan ajratilgan qo'shimcha mablag'larning minimal miqdori 10 foizdan 30 foizgacha oshirildi.
Joriy yilning may oyidan boshlab jamoatchilik fikri asosida tashkil etilgan tadbirlarni moliyalashtirish uchun respublika byudjeti hisobidan tanlangan tumanlar (shaharlar) byudjetlariga qo'shimcha ravishda 92,7 mlrd. so'm ajratildi.
Jamoatchilik fikri asosida tashkil etilgan tadbirlarni moliyalashtirish uchun ajratilgan mablag'lar tumanlar (shaharlar) hokimliklarida ochilgan "Fuqarolik tashabbuslari jamg'armasi"ning g'aznachilik hisobvaraqlarida to'planadi.
Jamiyat fikri asosida shakllangan tadbirlarni moliyalashtirish uchun mahalliy byudjet mablag'larining ajratilishi ustidan parlament nazoratini ta'minlash maqsadida "Mahalliy byudjet mablag'larini sarflashda jamoatchilik ishtirokini ta'minlash to'g'risida" Senat Kengashining Qarori qabul qilindi.
Qaror bilan jamoatchilik fikri asosida shakllanadigan tadbirlarga tumanlar (shaharlar) byudjetlaridan mablag' ajratish tartibi to'g'risidagi Namunaviy nizom tasdiqlandi.
