Siyosiy partiyalarga ommaviy tadbirlar o'tkazishga ruxsat berildi
Sog'liqni saqlash vazirligi siyosiy partiyalarga saylovchilar bilan ommaviy tadbirlarni o'tkazish qoidalariga o'zgartirishlar kiritdi.
2021-yil 23-iyulda bo'lib o'tgan O'zbekiston Respublikasi Markaziy saylov komissiyasining majlisida 2021-yil 24-oktyabrda bo'lib o'tadigan O'zbekiston Respublikasi Prezidenti sayloviga start berildi va saylov kampaniyasi rasman e'lon qilindi.
O'zbekiston Respublikasi saylov kodeksiga muvofiq, O'zbekiston Respublikasi Prezidentligiga nomzodlar va siyosiy partiyalarga saylovchilar bilan uchrashuvlar o'tkazish orqali tashviqot o'tkazish huquqi beriladi. Saylovchilar bilan uchrashuvlar nomzodlar va siyosiy partiyalar tomonidan mustaqil ravishda o'tkaziladi.
Shu munosabat bilan Respublika maxsus komissiyasining navbatdagi majlisida siyosiy partiyalarning saylovoldi jarayonida faol ishtirok etishi uchun zarur shart-sharoitlar yaratish bilan bog'liq ayrim masalalar ko'rib chiqildi.
Xususan, komissiya qarori bilan O'zbekiston Respublikasida faoliyat yuritayotgan siyosiy partiyalarning saylovchilar bilan uchrashuvlar kabi ommaviy tadbirlarni o'tkazish to'g'risidagi takliflari ma'qullandi.
Shu bilan birga, siyosiy partiyalar saylovchilar bilan uchrashuvlar o'tkazishda sanitariya-epidemiologiya va karantin talablariga rioya etishga, masalan, ishtirokchilar o'rtasida ijtimoiy masofaga rioya qilish, tibbiy niqob rejimiga rioya qilish, antiseptik vositalardan foydalanish, shuningdek, uchrashuvlarga taklif etilgan fuqarolarni koronavirus infektsiyasidan emlash kabi masalalarga e'tibor qaratish tavsiya etiladi, sog'liqni saqlash vazirligi matbuot xizmati xabar bermoqda.
