Muayyan yurisdiktsiyani tanlashda investorlar nimalarga e’tibor qaratadilar?
“Z/Yen Group” limited tahlil markazi ijroychi direktori, TXMM tuzish bo‘yicha xalqaro ekspertlar va maslahat guruhi ishtirokchisi Mayk Vardl xalqaro moliya markazlari, ularning faoliyati va vazifalari haqida to’xtalib o’tdi.
Xalqaro moliya markazlari - bu transchegaraviy moliyaviy operatsiyalar amalga oshiriladigan markazdir. Aynan shu yerda turli moliyaviy sektorlar, xizmatlar va operatsiyalar jamlangan. Ta’kidlash joizki, moliyaviy markazlar bir nechta vazifani bajarishi mumkin.
Bundan tashqari, XMMlar asosan mamlakatda xorijiy investorlar uchun yaratilgan imkoniyat va shart-sharoitlarni ifodalaydi. Muayyan yurisdiktsiyani tanlashda investorlar asosan, ishonchli institutlar, huquq tizimi – tartibga soluvchilar, sudlar, biznes yuritishning qulayligi va korrupsiyaning yo'qligi, kapital oqimlar, iqtidorlarning mavjudligi va yuqori malakali kadrlar uchun hayot sifati kabi omillarga e’tibor qaratadilar.
Kelajakda, hozirgi yetakchi XMMlar – masalan, Nyu-York va London kelgusi o'n yil ichida o'zlarining yetakchi mavqei uchun jiddiy raqobatga duch kelishlari dargumon. Ularning kapital bozorlarining chuqurligi, tasdiqlangan tajriba va iste'dodlarni jalb qilish qobiliyati muhim omildir. Ammo, shuni qayd etish joizki, biz Osiyo va AQShning yetakchi markazlaridan ham yuqori natijalarga erishishimiz mumkin. Bundan tashqari, siyosiy vaziyat tufayli Gonkongning Osiyo mintaqasidagi yetakchi mavqei bahsli bo'lib qolishi va uning o'rnini Singapur egallashi mumkin. Biroq, Gonkong materik Xitoy bozorlariga chiqish uchun muhim moliyaviy markaz bo'lib qolishi ehtimoldan xoli emas.
Shuningdek, statistik ma’lumotlarga ko’ra Singapur misolida, inson kapitalini rivojlantirish milliy strategiyasi moliyaviy xizmatlar sohasini malakali ishchilar bilan ta'minlashga yordam berishi haqida dalillar mavjud. Strategiyaning asosiy qismlaridan biri ishchi kuchi ichida ko'proq o'qitish va ta'lim olishini ta'minlash uchun sanoatda malaka oshirish yig'imlaridan foydalanish va Germaniya dual ta'lim tizimiga o'xshash akademik ta'lim bilan bir qatorda bevosita malaka oshirishni ta'minlashdan iborat.
